សុខភាពមាត់ធ្មេញគឺជារឿងមួយដ៏សំខាន់សម្រាប់មនុស្សគ្រប់រូប ដូច្នេះលោកអ្នកគួរតែយកចិត្ដទុកដាក់ថែរក្សាការពារឱ្យបានត្រឹមត្រូវ ដើម្បីចៀសវាងនូវបញ្ហាផ្សេងៗដែលកើតមានឡើង ជាពិសេសគឺការគេងសង្កៀរធ្មេញនេះតែម្ដង។ ព្រោះនៅពេលដែលលោកអ្នកកើតមានបញ្ហានេះ វាបណ្ដាលឱ្យលោកអ្នកមានការឈឺចុកចាប់ និងគេងមិនបានគ្រប់គ្រាន់ ហើយរំខានដល់អ្នកដទៃទៀតដែលគេងនៅក្បែរទៀតផង។
លោកទន្ដបណ្ឌិត ញាណ ភិរម្យ ប្រធានក្រុមគ្រូពេទ្យនៃមន្ទីរព្យាបាលធ្មេញបស្ចិម លោកនឹងធ្វើការបកស្រាយអំពីវិធីសម្រាលនៃការឈឺធ្មេញ ដើម្បីឱ្យលោកអ្នកបានជ្រាបកាន់តែច្បាស់អំពីបញ្ហានេះ។
និយមន័យ
ការសង្កៀរធ្មេញជាការកកិតរវាងធ្មេញ និងធ្មេញ ហើយធ្វើឱ្យធ្មេញសឹករេចរឹលរហូតឈឺចាប់ទៅដល់បណ្ដូរធ្មេញ និងបង្កឱ្យធ្មេញមានការប្រេះ ឬបែកបាន។
មូលហេតុដែលបណ្ដាលឱ្យគេងសង្កៀរធ្មេញ
មូលហេតុដែលបណ្ដាលឱ្យមានការសង្កៀរធ្មេញនេះមានពីរយ៉ាងគឺ
- ទី១ ៖ បណ្ដាលមកពីកំណើត ប៉ុន្ដែអត្រានេះមានតិចតួចបំផុត ដែលបណ្ដាលឱ្យកើតមកមានការសង្កៀរធ្មេញបាន ជួនកាលក៏អាចមានដែរ។
- ទី២ ៖ បណ្ដាលមកពីបាត់តេរី
ឬប៉ារ៉ាស៊ីតម្យ៉ាងដែលមាននៅក្នុងឈាម ក្រពះ ពោះវៀន
ហើយធ្វើចលនានៅពេលយប់។ នៅពេលដែលលោកអ្នកគេងនៅពេលយប់
វាបង្កឱ្យធ្មេញមានការសង្កៀរ
ហើយអត្រានៃការសង្កៀរធ្មេញនេះរហូត៩៩ភាគរយ គេងរើបម្រាស់ឬរមៀល។
លោកអ្នកដែលមានបញ្ហាឈឺធ្មេញច្បាស់ជាគេងមិនបានគ្រប់គ្រាន់ទេ
រហូតអាចរំខានដល់អ្នកដទៃទៀត ដែលគេងនៅក្បែរ។ផលប៉ះពាល់នៃការគេងសង្កៀរធ្មេញ
ផលប៉ះពាល់ពិតជាមានច្រើន ដូចជាបង្កឱ្យធ្មេញឆាប់ចាស់មុនអាយុ ធ្វើឱ្យធ្មេញឆាប់រេចរឹល និងប្រេះបែក។ ដោយសារតែធ្មេញសឹករេចរឹលដល់គល់ ធ្វើឱ្យធ្មេញមានរយៈពេលមិនជាបានយូរ ដោយធ្មេញមានសភាពពុកស្រួយ និងធ្វើឱ្យធ្មេញប្រេះបែក ឬក៏សឹកដាច់បន្ដិចម្ដងៗរហូតបែកជាផ្ទាំង។ ប៉ុន្ដែប្រសិនបើសឹករេចរឹលតែបន្ដិចទេ លោកអ្នកគួរតែរកវិធីធ្វើយ៉ាងណាកុំឱ្យមាននូវការ សឹករេចរឹល និងបែក។ យកល្អលោកអ្នកគួរតែទៅពិគ្រោះយោបល់ជាមួយគ្រូពេទ្យដែលមានជំនាញ ដើម្បីឱ្យគ្រូពេទ្យពិនិត្យរកមើល មេរោគនៅក្នុងឈាម និងបញ្ចុះមេរោគប៉ារ៉ាស៊ីត ឬបាក់តេរី។
មធ្យោបាយការពារ
ប្រសិនបើលោកអ្នកកើតមានបញ្ហាការគេងសង្កៀរធ្មេញ លោកអ្នកអាចប្រើប្រាស់នូវស្បៃការពារ ដើម្បីកុំឱ្យធ្មេញមានការប៉ះទង្គិចគ្នា។ ហើយមានមធ្យោបាយម្យ៉ាងទៀតគឺការយកស្បៃម៉ាទិច ព្រោះស្បៃម៉ាទិចជួយការពារធ្មេញរបស់លោកអ្នកមិនមានការសង្កៀរ ប៉ុន្ដែវាជាមធ្យោបាយមួយមិនសូវជាល្អប៉ុន្មានទេ។ មធ្យោបាយល្អបំផុតគឺនៅពេលដែលធ្មេញមានការសង្កៀរ លោកអ្នកគួរតែត្រូវទៅពិនិត្យ ឬពិគ្រោះយោបល់ជាមួយគ្រូពេទ្យជំនាញ ដើម្បីពិនិត្យរកមើលមេរោគប៉ារ៉ាស៊ីត ឬបាក់តេរីនៅក្នុងលាមកឬឈាម។ ការគេងសង្កៀរធ្មេញនេះមិនត្រឹមតែធ្វើខូចធ្មេញនោះទេ ថែមទាំងអាចបណ្ដាលឱ្យធ្មេញទាំងអស់ខូចបានផងដែរ។ ដូចពាក្យចាស់បានពោលថា ការពារប្រសើរជាងព្យាបាល។
ដំបូន្មានអ្នកប្រឹក្សា
លោកអ្នកដែលមានបញ្ហាគេងសង្កៀរធ្មេញ គួរតែប្រញាប់ប្រញាល់ទៅព្យាបាលឱ្យបានទាន់ពេលវេលា។ ប្រសិនបើ លោកអ្នកចេះតែទុកយូរទៅៗឱ្យធ្មេញមានសភាពកាន់តែធ្ងន់ធ្ងរ អាចបណ្ដាលឱ្យធ្មេញរបស់លោកអ្នកឈានទៅប្រេះបែក និងរហូតដល់ការដកចោលជាមិនខាន។ វាធ្វើឱ្យមានផលប៉ះពាល់ទាំងមានការឈឺចាប់ និងបាត់បង់នូវថវិកាមួយចំនួនទៀត។