ការតឹងច្រមុះ រមាស់ច្រមុះ ហៀរសម្បោរ រមាស់ក្រអូមមាត់ រមាស់ក ឈឺក មានស្លេស្មច្រើន ឈឺក្បាល នេះអាចជារោគសញ្ញានៃជម្ងឺអាឡែកស៊ីច្រមុះ។ ជម្ងឺអាឡែកស៊ីច្រមុះនេះ គេសង្កេតឃើញថា២ភាគ៣នៃអ្នកជម្ងឺ ច្រើនតែកើតមានឡើងមុនអាយុ៣០ឆ្នាំ ហើយក្មេងៗឧស្សាហ៍កើតជាងមនុស្សចាស់។ ជម្ងឺនេះភាគច្រើនបង្កឡើងដោយសារបរិស្ថាន ឬអាចបណ្ដាលមកពីតំណពូជក៏ថាបាន។
ទស្សនាវដ្ដី សុខភាពយើង បានធ្វើកិច្ចសម្ភាសន៍ជាមួយលោកវេជ្ជបណ្ឌិត ប្រាក់ ស៊ីថា ឯកទេសច្រមុះបំពង់កត្រចៀក នៅមន្ទីរពេទ្យព្រះអង្គឌួង លោកនឹងធ្វើការបកស្រាយអំពីប្រធានបទជម្ងឺអាឡែកស៊ីច្រមុះ ដើម្បីឱ្យលោកអ្នកនាងកញ្ញាបានជ្រាបកាន់តែច្បាស់អំពីបញ្ហានេះ។
ជម្ងឺអាឡែកស៊ីច្រមុះជាអ្វី?
ជម្ងឺអាឡែកស៊ីច្រមុះគឺជាប្រភេទជម្ងឺដែលបណ្ដាលមកពីការរលាក ច្រមុះ ឬផ្លូវដង្ហើមលើ ដោយសារសារធាតុផ្សេងៗ ជាពិសេសសារធាតុដែលមានក្នុងខ្យល់ធូលី លម្អងផ្កា ដែលគេហៅថា អាឡែកស្សែន។ នៅពេលដែលមនុស្សបញ្ចេញនូវគ្រឿង ការពារដែលហៅថាអង់ទីគ័រ ដើម្បីប្រឆាំងទប់ទល់នឹងអាឡែកស្សែនដែលមាននៅក្នុងខ្យល់រួចក៏បង្កើតបាន ជាជម្ងឺអាឡែកស៊ីច្រមុះនេះតែម្ដង។
មូលហេតុបង្កអាឡែកស៊ីច្រមុះ
មូលហេតុដែលបណ្ដាលឱ្យលោកអ្នកកើតមានជម្ងឺអាឡែកស៊ីច្រមុះនេះដោយសារតែកត្ដាធំៗពីរគឺ ៖
1 . តាមរដូវកាល ដល់ពេលមានការផ្លាស់ប្ដូររដូវទើបមានអាឡែកស៊ីច្រមុះកើតមានឡើង ហើយច្រើនតែកើតមានឡើង ដោយសារការចេញលម្អងផ្កា ឬលម្អងឈើផ្សេងៗជាដើម។
2 .មកពីធូលី រោមសត្វ តំណពូជ និងសារធាតុផ្សេងៗ ដែលមាននៅក្នុងផ្ទះរបស់លោកអ្នក ជាហេតុដែលធ្វើឱ្យលោកអ្នកកើតមានជម្ងឺអាឡែកស៊ីច្រមុះបាន។
រោគសញ្ញា និងរោគវិនិច្ឆ័យជម្ងឺអាឡែកស៊ីច្រមុះ
រោគសញ្ញាដែលបង្ហាញឱ្យដឹងថាជាជម្ងឺអាឡែកស៊ីច្រមុះ មានដូចជាក្អកក្រដាសច្រើននៅពេលព្រឹក តឹងច្រមុះ រមាស់ច្រមុះ ហៀរសម្បោរ ហើយការហៀរសម្បោរដំបូងជាទឹកថ្លា ក្រោយមកអាចទៅជាខាប់។ ការខាប់ដោយសារតែមានការរលាកបន្ថែម វាធ្វើឱ្យរមាស់ភ្នែក រមាស់ក្រអូមមាត់ រមាស់ក ឈឺក អាចមានស្លេស្មច្រើន អាចមានឈឺក្បាល នេះសុទ្ធសឹងជារោគសញ្ញាជម្ងឺអាឡែកស៊ីច្រមុះ។
ក្នុងការធ្វើរោគវិនិច្ឆ័យត្រូវសាកសួរអំពីប្រវត្ដិរបស់អ្នកជម្ងឺ ថាតើគាត់ចាប់ផ្ដើមធ្វើទុក្ខនៅពេលណា នៅកន្លែងណា។ ហើយការធ្វើទុក្ខនៅតាមរដូវ ឬក៏ធ្វើទុក្ខរាល់ថ្ងៃ ហើយការធ្វើទុក្ខដូចបានរៀបរាប់ខាងលើនេះដែរឬអត់។ ប៉ុន្ដែជួនកាលរោគសញ្ញារបស់អ្នកជម្ងឺអាចធ្វើឱ្យលោកអ្នកដឹងថាជាជម្ងឺ អាឡែកស៊ីបាន ជួនកាលអាចពិនិត្យ ហើយការពិនិត្យនេះត្រូវពិនិត្យទៅលើមាត់ បំពង់ក ត្រចៀក ជាពិសេសច្រមុះអាចមានបញ្ហាសើម រីក ឬមានដុះសាច់ក្នុងច្រមុះ ដែលហៅថាឫសដូងច្រមុះ ឬក៏មានបញ្ហាខ្លះៗ ដូចជាវៀច ខ្ទង់ច្រមុះជាដើម។ ការវៀចខ្ទង់ច្រមុះនេះមិនមែនធ្វើឱ្យមានអាឡែកស៊ីទេ គ្រាន់តែថាមានការវៀចខ្ទង់ច្រមុះផង និងអាឡែកស៊ីផង វាធ្វើឱ្យអ្នកជម្ងឺពិបាកក្នុងការដកដង្ហើម។ កត្ដាភាគច្រើនដែលទាក់ទងនឹងអាឡែកស៊ីច្រមុះ សំខាន់ជាងគេគឺបណ្ដាលឱ្យកើតមានជម្ងឺឫសដូងច្រមុះទៅថ្ងៃក្រោយ។ ក្នុ្នងការធ្វើរោគវិនិច្ឆ័យផ្សេងៗទៀត ដូចជាការធ្វើតេស្ដនៅលើស្បែកអ្នកជម្ងឺ ឬមួយក៏ធ្វើតេស្ដ ដោយយកឈាមទៅពិនិត្យក៏បានហើយមានប្រសិទ្ធភាពជាង។
ផលប៉ះពាល់របស់ជម្ងឺអាឡែកស៊ីច្រមុះ
ផលប៉ះពាល់នៃជម្ងឺអាឡែកស៊ីច្រមុះគឺមានច្រើន ប្រសិនជាលោកអ្នកមិនយកចិត្ដទុកដាក់ក្នុងការព្យាបាលទេអាចមានផលវិបាក ជាមិនខាន។ ឧទាហរណ៍ករណីការរលាកច្រមុះ ហើយការរលាកច្រមុះអាចធ្វើឱ្យរលាកដល់ទីនីស ព្រោះទីនីសគឺជាឆ្អឹងប្រហោងក្នុងដែលស្ថិតនៅជុំវិញច្រមុះរបស់មនុស្ស ដែលមានទីនីសច្រើន មានដូចជានៅថ្គាម ថ្ងាស នៅចន្លោះភ្នែកច្រមុះ និងស្ថិតពីក្រោយច្រមុះ។ នៅពេលដែលមានការរលាកច្រមុះ ឬរលាកទីនីសអាចធ្វើឱ្យកើតជាឫសដូងច្រមុះ ដែលអាចប៉ះពាល់ទៅដល់ត្រចៀក រហូតធ្វើឱ្យរលាកត្រចៀកកើតជាអំបៅអំបែក អាចប៉ះពាល់ដល់ភ្នែក ប៉ះពាល់ទៅដល់សើស្បែក បង្កទៅជាកន្ទាលក្រហម ជាំ ជួនកាលអាចកើតជាហឺតបានដែរ។ មិនត្រឹមតែប៉ុណ្ណឹងទេ កាលណាដែលលោកអ្នកកើតមានជម្ងឺនេះ វាអាចធ្វើឱ្យមានផលប៉ះពាល់ទៅដល់ការងារប្រចាំថ្ងៃ ការសិក្សារៀនសូត្រ ព្រោះវាធ្វើឱ្យលោកអ្នកអស់កម្លាំង ឈឺក្បាល ទទួលទានដំណេកមិនបាន ហើយផលវិបាកមួយទៀតគឺខាងថវិកាទៀត។
វិធីការពារជម្ងឺអាឡែកស៊ីច្រមុះ
វិធីការពារដើម្បីទទួលបានប្រសិទ្ធភាពបំផុតនោះ លោកអ្នកគួរចៀសវាង មិនត្រូវប៉ះពាល់ឬស្រូបនូវសារធាតុផ្សេងៗ ដែលបង្កឱ្យកើតជម្ងឺអាឡែកស៊ីនេះ។ ពេលចេញដើរទៅណាមកណាត្រូវពាក់ម៉ាសការពារឱ្យបានខ្ជាប់ខ្ជួន នៅផ្ទះត្រូវបិទបង្អួចដើម្បីកុំឱ្យសារធាតុផ្សេងៗ ឬធូលីចូលបានតាមរយៈខ្យល់ ត្រូវសម្អាតផ្ទះឱ្យបានស្អាតបាត។ ហើយសម្រាមនៅពេលដែលលោកអ្នកបោសត្រូវខ្ចប់ឱ្យបានត្រឹមត្រូវ ជាពិសេសត្រូវមានអនាម័យខ្លួនជានិច្ច។
ដំបូន្មានរបស់អ្នកប្រឹក្សា
ដើម្បីរក្សាសុខភាពឱ្យបានល្អ លោកអ្នកត្រូវចៀសវាងនូវប្រការខ្លះៗដូចបានរៀបរាប់ខាងដើម និងកត្ដាមួយចំនួនទៀត ដូចជាត្រូវចៀសវាងនូវសារធាតុផ្សេងៗដែលធ្វើឱ្យលោកអ្នកកើតអាឡែកស៊ី និងត្រូវមានអនាម័យតាំងពីការបោស ទុកដាក់សម្រាមការសម្អាតទីលំនៅសព្វគ្រប់បែបយ៉ាងទាំងអស់។
បច្ចុប្បន្ននេះប្រទេសកម្ពុជាមានថ្នាំសម្រាប់ព្យាបាលដោយខ្លួនឯងបាន ប៉ុន្ដែក្នុងករណីខ្លះលោកអ្នកមិនត្រូវព្យាបាលដោយខ្លួនឯងទេ ត្រូវតែទៅជួប និងពិគ្រោះយោបល់ជាមួយគ្រូពេទ្យជំនាញទើបជាការប្រសើរ។
ប្រភព៖ទស្សនាវដ្ឋីសុខភាពយើង