នៅក្នុងនាទីសុខភាពនិងអនាម័យថ្ងៃនេះ អៀង សុខម៉ិញ បានអញ្ជើញវេជ្ជបណ្ឌិត Christophe Azevedo សូមជំរាបជូនលោកអ្នកនាង អំពីសុខភាពធ្មេញរបស់កុមារ។ ហេតុអ្វីបានជាធ្មេញក្មេងមានពណ៌លឿង ? ធ្មេញទឹកដោះមានប្រយោជន៍យ៉ាងណាខ្លះ ? តើត្រូវចាប់ផ្តើមដុសសម្អាតធ្មេញដោយប្រើច្រាស ពេលណា ? និងគួរជ្រើសរើសថ្នាំដុះធ្មេញប្រភេទណា ?
១- ហេតុអ្វីបានជាធ្មេញទឹកដោះរបស់កូនក្មេង មានពណ៌ឡើងលឿង ? ជាធម្មតាម្តាយគ្រប់រូបគិតថាធ្មេញលឿងគឺបណ្តាលមកពីកុមារនោះបាន ប្រើប្រាស់ថ្នាំផ្សះច្រើន តើគំនិតនេះសមហេតុផលដែរឬទេ ?!
វេជ្ជបណ្ឌិត Christophe Azevedo ៖ និយាយដោយស្មោះត្រង់ គំនិតដែលចោទថ្នាំផ្សះថាជាបុព្វហេតុនាំធ្មេញលឿង លែងសមហេតុផលហើយ ! សូមកុំភ្លេចថា ធ្មេញស្រុក នឹងមានសភាពលឿងជាងធ្មេញព្រៃ ឬធ្មេញទឹកដោះ ព្រោះធ្មេញស្រុកមានការលូតលាស់ រចនាសម្ព័ន្ធ និងសាច់ធ្មេញខុសពីធ្មេញទឹកដោះ។ កាលពីមុនគេអាចគិតដូច្នោះបាន គិតថាលេបថ្នាំផ្សះច្រើននឹងអាចធ្វើឱ្យធ្មេញលឿងខ្លាំង ប៉ុន្តែពេលសម័យបច្ចុប្បន្ននេះ អ្នកស្រាវជ្រាវវេជ្ជសាស្ត្របានដឹងហើយ ព្រមទាំងមានការប្រុងប្រយ័ត្ន មិនឱ្យមានថ្នាំផ្សះអង់ទីប៊ីយ៉ូទិចណាបង្ក ឬរំខានដល់សុខភាពធ្មេញទៀតទេ។ ពណ៌លឿងជាញឹកញាប់ច្រើនបណ្តាលមកពីកាលសំណល់ សំអេកជាប់កកលើធ្មេញប៉ុណ្ណោះ។
២- ចុះធ្មេញឡើងពណ៌ខ្មៅ ?
- វេជ្ជបណ្ឌិត Christophe Azevedo ៖ ក្នុងករណីនេះ ត្រូវទៅជួបគ្រូពេទ្យឯកទេសធ្មេញភ្លាម។ ប្រសិនបើសាច់ធ្មេញទឹកដោះខាងក្នុងមានពណ៌ខ្មៅ នោះអាចជាការប្រែប្រួលជាលិកា ជាលិការស់របស់ធ្មេញដែលរងការប៉ះទង្គិច មានគ្រាំ សរសៃប្រសាទដំណើរការមិនស្រួល ទើបធ្វើឱ្យសភាពខ្មៅៗលេចឡើងនៅក្នុងធ្មេញ ដូច្នេះត្រូវទៅព្យាបាលភ្លាម។
៣- កុមារដែលបាក់ធ្មេញព្រៃមុនអាយុកាល តើអាចមានផលវិបាកអ្វីទៅថ្ងៃក្រោយដែរឬទេ?
- វេជ្ជបណ្ឌិត Christophe Azevedo ៖ នោះវាអាស្រ័យទៅនឹងពេលវេលានៃការបាក់ធ្មេញ។ បើបាក់ឬបែកជ្រុះធ្មេញទឹកដោះ ពេលជិតដល់អាយុបាក់ជាធម្មជាតិ នោះវាមិនអីទេ។ ធ្មេញស្រុកនឹងលូតលាស់ដុះចេញមកជំនួសកន្លែងធ្មេញព្រៃលឿនៗ។ ផ្ទុយទៅវិញ បើកុមារ បាក់ធ្មេញទឹកដោះឆាប់ពេក នៅអាយុតិចទើបតែពីរឬបីខួប នោះត្រូវសាកល្បងយកធ្មេញបាក់មកភ្ជាប់វិញ ព្រោះថាធ្មេញព្រៃនេះមានតួនាទីសំខាន់ណាស់ ក្នុងការរក្សាកន្លែង។ ប្រសិនបើគ្មានធ្មេញព្រៃទេ ធ្មេញផ្សេងៗទៀតអាចយកកន្លែង បិទមិនឱ្យធ្មេញសុ្រកដុះលូតលាស់ចេញមកក្រៅបាន។ ម្យ៉ាងទៀត ចំពោះធ្មេញកណ្តុរខាងមុខវិញ មានតួនាទីសំខាន់បន្ថែមមួយទៀតក្នុងការសិក្សានិងបញ្ចេញសំឡេងរៀន ភាសានិយាយ។ ជាដំណោះស្រាយ បើមិនអាចភ្ជាប់ធ្មេញបានទេ នោះត្រូវតែទៅពេទ្យដើម្បីបំពេញចន្លោះ ធ្មេញនេះ ឱ្យរក្សាកន្លែងទំនេរសម្រាប់ធ្មេញស្រុក។
៤- ចាប់អាយុប៉ុន្មានខែ ប៉ុន្មានឆ្នាំ គួរចាប់ផ្តើមដុះធ្មេញឱ្យកុមារ ? ព្រោះថាមិនជាការងាយស្រួលទេដែលចាប់បង្ខំឱ្យទារក កុមារបើកមាត់ ហើយចាប់ដុសធ្មេញ ម្តាយគ្រប់រូបតែងតែខ្លាចធ្វើឱ្យកូនឈឺទៀតផង !
- វេជ្ជបណ្ឌិត Christophe Azevedo ៖ មិនត្រូវរុញរា ខ្លាចទេ ! នៅពេលដែរកុមារមានធេ្មញដុះចេញមកក្រៅពេញរូបរាងហើយ ពោលគឺនៅអាយុប្រមាណ៦ខែ ធ្មេញនោះអាចរងការវាយប្រហារដង្កូវស៊ីបានគ្រប់ពេលវេលា ដូច្នេះអ្នកជាឪពុកម្តាយត្រូវតែថៃទាំសម្អាតធ្មេញនោះឱ្យកូន ដោយជាបឋមត្រូវប្រើសំឡីកុំប្រេសពេទ្យសើមៗយកទៅជូតដុសលើធ្មេញ។ ដល់អាយុ១៨ខែ (មួយឆ្នាំកន្លះ) នៅពេលដែលចាប់ផ្តើមមានធ្មេញមុនថ្គាម នោះយើងអាចចាប់ផ្តើមដុះធ្មេញដោយប្រើកូនច្រាស និងដាក់ថ្នាំដុសធ្មេញបន្តិចនៅចុងច្រាស។ ដើម្បីការពារកុំឱ្យកុមារលេបថ្នាំដុសធ្មេញអ្នកជាម្តាយ ឬឪពុកត្រូវតែជួយដុសឱ្យកូន តែបើលេបបន្តិចបន្តួចក៏មិនអីដែរ។
៥- តើមានក្បួន និងច្បាប់វិធាននៃការដុសសម្អាតធ្មេញ ?
- វេជ្ជបណ្ឌិត Christophe Azevedo ៖ ក្បួនដុសសំខាន់បំផុត ដែលត្រូវទម្លាប់កុមារឱ្យដឹង គឺត្រូវដុសធ្មេញទាំងអស់ ធ្មេញមានច្រើន ជាទូទៅយើងច្រើនតែភ្លេចធ្មេញដែលនៅក្នុងៗ ជ្រៅៗ។ ឆ្លុះកញ្ចក់ដុះឱ្យគ្រប់ធ្មេញ តាមសម្រួល មិនបាច់ប្រើកម្លាំងទេ តែគ្រប់ធ្មេញទាំងអស់។ ហើយក្នុងវ័យនេះ មិនចាំបាច់អ្វីត្រូវគោរពរបៀបរបបដុស ពីលើចុះក្រោម ពីក្រោមឡើងលើ ឬជារង្វង់លើធ្មេញទេ។ ច្រាសដុសធ្មេញ យកល្អត្រូវមានសរសែទន់ៗ។ ច្រាសដុសធ្មេញដាក់ថ្ម ឬដើរដោយអគ្គិសនី គ្មានប្រយោជន៍សោះសំរាប់កុមារ លើកលែងតែក្មេងជំទង់ និងមនុស្សចាស់ទើបអាចទាញផលល្អពីច្រាសដុសធ្មេញប្រភេទនេះ។
៦- តើជាការញឹកញាប់ទេដែលធ្មេញទឹកដោះអាចមានដង្កូវស៊ី ?
- វេជ្ជបណ្ឌិត Christophe Azevedo ៖ ធ្មេញទឹកដោះ ក៏ដូចជាធ្មេញផ្សេងៗទៀតដែរ អាចទទួលរកការវាយប្រហារពីសំណាក់សារធាតុអាស៊ីត ឬដង្កូវស៊ី បានគ្រប់ពេលវេលា ! អាការៈនេះ អាស្រ័យទាំងស្រុងទៅលើរបៀបរបបរស់នៅ ការរក្សាអនាម័យមាត់ធ្មេញ មុននឹងចូលគេង ត្រូវតែដុះធ្មេញ និងជាពិសេសមានរបបចំណីអាហារត្រឹមត្រូវ។ មិនត្រូវឱ្យកូនបៅទឹកដោះគោពេលចូលគេង ហើយបៀមស្តឹមទាល់តែលក់ទេ។ ទឹកគោនេះអាចធ្វើឱ្យដង្កូវស៊ីធ្មេញផ្នែកខាងក្រៅ។
៧- ចាប់ពីអាយុប៉ុន្មានឡើងទៅ ដែលឪពុកម្តាយគួរនាំកុមារទៅពិនិត្យសុខភាពមាត់ធ្មេញ?
- វេជ្ជបណ្ឌិត Christophe Azevedo ៖ កាន់តែឆាប់កាន់តែល្អ ដើម្បីទម្លាប់កូនឱ្យស្គាល់ពេទ្យ ស្គាល់ថ្នាំ ស្គាល់ក្លិន ហ៊ានឡើងគ្រែ ឱ្យពេទ្យមើលធ្មេញ ។ល។ អាយុបីឆ្នាំ ការពិនិត្យសុខភាពធ្មេញគួរតែត្រូវធ្វើ ដើម្បីមើលការវិវត្តន៍របស់ធ្មេញផង និងដើម្បីវែករកធ្មេញមានជំងឺផង ព្រោះជាញឹកញាប់មានដង្កូវស៊ីធ្មេញតែ ម្តាយឪពុកមិនបានចាប់អារម្មណ៍។
ខាងក្រោមនេះជាការជ្រើសរើស ថ្នាំដុះធ្មេញ សមស្របតាមអាយុកុមារ
- រហូតដល់អាយុបីឆ្នាំ (ពី១២ខែ ដល់ ៣៦ខែ) ត្រូវជ្រើសរើសថ្នាំដុសធ្មេញដែលមានសារធាតុ កំហាប់ផ្លុយអ័រ ៥០០ ppm de Fluor - ដុសម្តងក្នុងមួយថ្ងៃ មុនពេលចូលគេង
- ៣ ទៅ ៦ឆ្នាំ ត្រូវជ្រើសរើសថ្នាំដុសធ្មេញ ក្នុងកំរិតផ្លុយអ័រ ៥០០ ppm de Fluor ពីរដង ក្នុងមួយថ្ងៃ
- ចាប់ពីអាយុ ៦ឆ្នាំ ឡើងទៅ អាចប្រើថ្នាំដុសធ្មេញដែលមានកំហាប់ជាតិផ្លុយអ័រ ពី១០០០ ដល់ ១៥០០ ppm de Fluor ពីរដងក្នុងមួយថ្ងៃ ម្តងៗរយៈពេលបីនាទី។
លេបថ្នាំដុសធ្មេញបន្តិចបន្តួចចូលពោះមិនជាថ្វីទេ ប៉ុន្តែបរិមាណជាតិផ្លុយអ័រ គួរតែត្រូវគោរពឱ្យបាន ព្រោះហួសចំណុះជាតិផ្លុយអ័រ ក៏អាចជាបុព្វហេតុនាំឱ្យធ្មេញឡើងពណ៌ដែរ៕
(ប្រភព៖ វិទ្យុបារាំងអន្តរជាតិ )
